Uniforme Farda, Hein Despaisu Ministerial

DILI, STLNEWS.co – Uniforme farda ba eskola sira iha teritoriu laran sei hein despaisu ministerial, hodi implementa iha eskola.

Kestaun nee hatoo husi Diretor Jeral Administrasaun Jestaun i Finansas husi MEJD, Antoninho Pires ba STL, Kinta nee (23/03/2023).

“Ami sei halo hela despaisu ministerial, neebe too agora seidauk hotu, ami foin mak prepara hela atu hasai despaisu ministerial ou diploma ministerial konaba uza uniforme, ami hanoin katak, depois fulan ida ka rua, diploma nee ami hasai nee mak bele implementa, posibilidade mak nee, agora daudaun sira uza hela farda anterior,” dehan Pires.

Antoninho dehan, uniforme nee ba estudantes hahu husi nivel pre eskolar, ensinu baziku sekundariu too tekniku vokasional, nee depende husi modelu farda neebe mak iha, ezemplu agora daudaun sira uza farda oin tolu.

“Modelu neebe ami hanoin nee atu tau uniforme ida deit, ezemplu pre eskolar ida deit, ensinu baziku oin ida, sekundariu modelu ida no tekvo modelu ida. Ami hasai ida nee atu uniforma deit fila ba eskola, inan aman mak haree farda nee, maibe ami halo diploma nee atu uniforma deit, estudantes hotu sai modelu oin ida,” katak nia.

Iha fatin seluk, Diretor EBC Bidau Akadiru-hun, Roberto Jeronimo Cristovao dehan, konaba farda nee agora daudaun estudante sira sei uza nafatin farda neebe mak antes nee sira uza tuir loron, tanba nee husi parte eskola nian hein deit, bainhira mak atu implementa uniforme farda nee iha eskola sira.

“Hau hanoin ami sei uza nafatin farda tuan, neebe antes nee ami nian estudante sira uza ona, no ami husi eskola hein deit bainhira mak husi edukadaun fo sai tan konaba uniforme farda iha ita nian eskola sira,” dehan Roberto.

(jac)

LEAVE A REPLY

Please enter your comment!
Please enter your name here